Lyrics: Prashant Malik
Music: Adwait Sharma
Main thakk kar baitha hoon zameen par,
Mere mann mein phirse wahi khayaal utha hai,
Jawaab dhoondhne mein zindagi beet rahi hai,
Mere khud ke wajood par ek sawaal utha hai.
Main kaun hoon, kya hoon, kyon hoon,
Khud se ab yeh pooch raha hoon,
Kab takk iss daur mein rehna padega ae khuda,
Main asal zindagi aur ek sapne ke beech joojh raha hoon.
Main soch raha hoon,
Kab takk yuhin karta rahunga main khoj apni,
Kya kabhi khul kar saans le sakunga main,
Yaa yuhin bana kar rakhunga iss zindagi ko bojh apni.
Ek ghutan si bhi hai aur raahat bhi,
Dil mein sukoon ki dhakan bhi hai aur bae-chaini ki aahat bhi,
Main jeena chahta hoon khud ke saath saccha reh kar,
Aur karna chahta hoon baaki harr cheez se bagawat bhi.
Chahat bhi,
Hai mere mann mein ki khud ke liye kuch kar ke dekhun,
Jeete-jee toh aaisa ho nahi paa raha Ardas,
Toh kya ab iske liye main Marke dekhun?
Aaisa hona na-mumkin sa lagta hai,
Par yeh khayaal mujhe doobara na sataye toh kitna accha hoga,
Duniya mujhe yahin par haseen lagg rahi hai,
Iss neend se mujhe koi na uthaye toh kitna accha hoga