Lyrics: Jérôme Casalonga
Music: Jérôme Casalonga
Oghje la to Corsica sulenne
Sbuffuleghja lu to core
Suminendu solu fumu è pene
L’ingannemu à tutt’ore.
Ma ci hè ghjente quì vicinu, chì camina di passione
Sopra stu mondu di nimu, ch’arruvina lu rughjone
T’accumpagneranu mane è sera
Cantendu per tè l’amore
È d’una bellissima manera
Cum’è l’impruvisatore
Barattendu le parole sciolte è sparsa à lu marinu
À chì cappia à chì molle u so versu lu più finu
D’una strada fatta di lumera
Cusì si trova la rima
Ch’ella sia sempre di spartera
È ghjunghje sin’à la cima
Francheremu à passupassu ogni sarra ogni muntagna
È di tuttu stu fracassu ne feremu una cuccagna
Tù sì ! Chì sà ! À dì ! Chì ci vole à fà !
È quì ! Quallà ! Fiurì ! U solu andà!
Di stu gran’ cumerciu incutuppatu
Ne sorte più chè mullizzu
È per quellu chì hè malavviatu
Lu so scopu sarà guizzu
Ma sì tù cara zitella, à supranà lu circondu
Luci cum’è quella stella, chì s’arrizza ad ogni modu
Ci saremu tutti riuniti,
À l’appollu per mundà
Di sti frutti colti è puliti,
Sbuchji pronti à assuvà
Tarra corsa cultivata ricca di mille bellezze
Ghjuventu aggalabata fiera di tante salvezze
Tù chì ti ramenti d’ogni stonde
Ti vogliu ringrazià
Ci raconti tuttu cum’è l’onde
Pur più à l’infinità
À francà issu curridò senza colpi nè mazzata
Cù una grande prucissiò ti purtemu a l’alzata
Oghje la to Corsica sulenne
Aspetta lu to parè!