Music: Sean Dagher
Mout avetz faich long estatge
Amics, pois de mi.us partitz,
Et es me greu e salvatge,
Quar me juretz e.m plevitz
Que als jorns de vostra vida
Non acsetz dompna mas me;
E si d'autra vos perte,
M'avetz morta e trahida,
Qu'avi'en vos m'esperanssa
Que m'amassetz ses doptanssa.
Bels amics, de fin coratge
Vos amei, pois m'abellitz,
E sai que faich ai follatge,
Que plus m'en etz escaritz;
Qu'anc non fis vas vos ganchida,
E si.m fasetz mal per be:
Be.us am e non m'en recre;
Mas tan m'a amors sazida
Qu'ieu non cre que benananssa
Puosc'aver ses vostre'amanssa.
Mout aurai mes mal usatge
A las autras amairitz:
Qu'om sol trametre messatge
E motz triatz e chausitz.
Anz sui pensiv'e marrida
Car de m'amor nu.us sove,
E si de vos jois no.m ve,
Tost me trobaretz fenida:
Car per pauc de malananssa
Mor dompna, s'om tot no.il lanssa.
Tot lo maltraich e.l dampnatge
Que per vos m'es escaritz
Vos fai grazer mos linhatge
E sobre totz mos maritz;
E s'anc fetz vas me fallida,
Perdon la.us per bona fe;
E prec que venhatz a me,
Despois quez auretz auzida
Ma chanson, que.us fatz fiansa
Sai trobetz bella semblansa.