Lyrics: Jérôme Casalonga
Music: Jérôme Casalonga
Stu pazzu chi m’hà fattu lazzu
Parturitu d’una mela
Chì scimisce à mezu mondu fendu muraglioni fatti di sumere
Sbarazzu noi femu tazzu
À piglià lu à calci in culu
Boffu quant’è Satanassu veru simpliciottu messu à u pudere
Sciambulone di cullata, patanechja in capu quellu si merita
Catarochju imbambulitu ciarbellu suffrittu à l’oliu di pastizzu
Quanti danni n’averà fattu scempii per stu mondu tamanta ferita
Quelli chì l’anu purtatu pacheranu elli tuttu issu mullizzu
U falzu à testa di cazzu
D’esse riccu ellu cridia
Si pigliava per sbaccone hà finitu guizzu tuttu sgangaratu
Palazzu diventatu stazzu
U tinellu tufunatu
E so pecure cappiate belu di curnachja fiscu tartagliatu
Quandu balla scianchiteghja, pare cuntrariatu mi scappa una risa
Ma la so pensata stramba à mè mi dispiace è m’arreca a paura
Tuttu issu dispettu fattu è pulitichella di poca analisa
Quattru anni sò longhi assai à passà u tempu di tanta sciagura
U riccu diventatu piccu
Nimu ùn la si meritava
Hà cumpratu tuttu ognunu cù li so suldacci fatti à disprezzu
Plasticcu si cridia sciccu
Travalatu di statura
Oghje si ne và tranquillu mancu vergognosu ùn pachendu prezzu
Cosa diventerai, Calamità
Ùn vulta mai più, tà puru qualà
Ùn ci vole à aspettà, Ùn perdunà
Quessu ùn lu pari più, Ùn lu lascià fà
Eccu chì si ne và
Stu carnavà
Ora cantala tù
Poi rincumincià !