Lyrics: Dario Muci
Music: Dario Muci
Caminanu pe lle strate
persi comu piccinni senza matre
senza nu sguardu ca li ole bene
ma sulu occhi ca fannu male,
ca sontu ommini e no animali
tuttu era b’essere normale
la canuscimu già sta storia
perchè simu meridionali.
Sso rriati li marrucchini
cu ndi cogghinu li pummitori
e sso rriati li tunisini
cu ndi cogghinu li miluni,
quiddhu ca a nui non di piace fare
mandamu schiavi pe faticare
nui sulu quistu sapimu fare
quiddhi di fore l’imu cumandare.
Arrivanu li capurali
la gerarchia non è caduta
e sso turnati li generali
tutta la lotta non è bastata,
sti disgraziati stannu minati
mienzu la strada sotta gli uliveti
sfruttati e senza dignità
quista è la nostra società.
Mohammed è mortu comu nu schiavu
lassatu sulu comu nu cane
mienzu nu campu abbandonatu
sotta li cuerpi ti lu cautu infame,
Mohammed è mortu perché hannu ulutu
non l’ha vulutu certu lu sole
ma qualched’unu l’ha mandatu
cu sbocca sangu mmienzu fore.
Amara terra mara.
Lu paese s’ha organizzatu
na grande manifestazione
ministri e sindaci di parte
ca parlanu di integrazione,
ma comu si parla di integrazione
se c’è sulu emarginazione
quista è la terra dell’accoglienza
ma facitime lu favore.
Amore mio ritorna a casa
amore non mi chiami cchiùi
sarà successa qualche cosa
amore dimme tu a ddo stai,
ca sontu ommini e no animali
tuttu era bb’essere normale
la canuscimu già sta storia
perche simu meridionali.
Amara terra mara