Music: Sean Dagher
Na Carenza al bèl còrs avenenz,
donatz conselh a nos doas serors,
e car saubetz mielhz triar la melhors,
consilhatz mi second vòstr'escïenz:
penrai marit a vòstra conoissença,
o'starai mi pulcela? E si m'agença,
que far filhons non cuit que sia bos
e sens marit mi par tròp angoissós.
N'Alaisina Yselda, 'nsenhamenz
prètz e beltatz, jovenz, frescas colors
conosc qu'avetz, cortisia e valors,
sobre totas las autras conoissenz;
per qu'ie·us conselh per far bona semença
penre marit coronat de scïença,
en cui faretz fruit de filh glorïós.
Retenguda's pulcel' a cui l'espós.
Na Carenza, penre marit m'agença,
mas far infanz cuit qu'es gran penitença,
que las tetinas pendon aval jos
e lo ventrilh es rüat e'nojós.
N'Alaisina Yselda sovinença
ajatz de mi in l'umbra de guirença:
quant i siretz prejatz lo Glorïós
qu'al departir mi ritenga près vos.